«جاھاندىق يادرولىق قاۋىپسىزدىك» باعدارلاماسىن جۇزەگە اسىرۋ شەڭبەرىندە قازاقستانداعى اقش ەلشىلىگىنىڭ جانىنداعى اقش قورعانىس مينيسترلىگىنىڭ قاۋىپ-قاتەردى ازايتۋ جونىندەگى اگەنتتىگىنىڭ وكىلدەرى كەلدى.
اقش قورعانىس مينيسترلىگىنىڭ قاۋىپ-قاتەردى ازايتۋ جونىندەگى اگەنتتىگىنىڭ ءبولىم ديرەكتورى كولدەر ستيۆەن ريچارد جانە ونىڭ ارىپتەستەرى جەرگىلىكتى پوليتسيا دەپارتامەنتىندە وتكەن كەزدەسۋگە قاتىستى. مەيماندار مۇراجايدى ارالاپ, جەدەل باسقارۋ ورتالىعىنىڭ جابدىقتالۋىمەن تانىستى.
قازاقستاندىق پوليتسيانىڭ قۇرىلۋ تاريحىمەن تانىسقان اسكەري قوناقتار ەرەكشە اسەرگە بولەندى. كولدەر ستيۆەن ريچارد ەستەلىك كىتاپقا «...ءار داۋىردەن سىر شەرتەتىن ەكسپوناتتاردىڭ تۇپنۇسقاسى, ولاردىڭ سيپاتتاماسى, ەكسپوزيتسيالار تاريحقا دەگەن قۇرمەتتى كورسەتەدى. قىزمەت اتقارۋ كەزىندە قازا تاپقان قىزمەتكەرلەرگە, ەكىنشى دۇنيەجۇزىلىك سوعىستى ماڭگى ەستە ساقتاۋعا ەرەكشە كوڭىل بولىنگەن. سىزدەردىڭ مۇراجايىڭىز جانە ونىڭ ساقتاۋشىلارى ەل تاريحى تۋرالى ەستەلىكتەردى مولىنان جيناستىرعانى بايقالادى», دەگەن جىلى تىلەككە تولى قولتاڭبا قالدىردى.
شەتەلدىك قوناقتار جەدەل باسقارۋ ورتالىعىنىڭ جۇمىسىنا جوعارى باعا بەردى. پوليتسيا ۋچاسكەلەرىنە 1140 كامەرا ورناتىلعان. ونىڭ ءبىر بولىگى وبلىس ورتالىعىنداعى 13 ۋچاسكەلىك پوليتسيا پۋنكتىنە تىكەلەي قوسىلعان. قوعامدىق قاۋىپسىزدىك شارالارىمەن مەكتەپتەر, اۋرۋحانالار دا قامتاماسىز ەتىلگەن.
پوليتسيا دەپارتامەنتىنىڭ باستىعى, پوليتسيا گەنەرال-مايورى بەرىك ءبىلالوۆ اقش اسكەريلەرىن الداعى جۇمىس جوسپارىمەن تانىستىرىپ, كريمينالدىق احۋالدىق قالىپتى ەكەنىن جەتكىزدى.
شەتەلدىك دەلەگاتسيا ۇلتتىق ۇلان پەتروپاۆل اسكەري ينستيتۋتىندا دا بولىپ, ءىس-تاجىريبەلەر الماستى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى